LAOAG CITY – Inlawlawag ni Barangay Chairman Roger Baloaloa iti Barangay 39 ditoy ciudad ti Laoag no anya ti nagbalin a rason da tapno mangputar ti maysa nga ordinansa seknan iti panagtsismis.
Segun kenni Baloaloa, ti panagriri dagiti kabarangayan na gapo iti tsimis ti kangrunaan a rason da ken kunana a mauma dan a mangsolsobar iti riri gapo laeng iti panagtsismis.
Basar iti ordinansa, agmulta ti P500 ken tallo nga aldaw a community service ti first offense, P700 ken lima nga aldaw a panagdalos para iti second offense ken P1,000 ken pito nga aldaw a community service iti third offense.
Nupay kasta, kuna ti kapitan ng in-inot nga ited daytoy dagiti maseknan gapo ta ammo na ti rigat ti biag.
Gagem ti nasao nga ordinansa tapno mailiklik ti barangay da iti madi a pakidamdamagan.
Naamoan a ti nasao nga ordinansa ket sakop na pay dagiti dayo wenno dagiti sumrek iti barangay da tapno laeng agitsismis.
Mainaig iti daytoy, kuna ni Baloaloa nga addan ti nariri ngem nasolbar met laeng daytoy.
