LAOAG CITY – Pimmusayen ni Antipolo City 2nd District Rep. Romeo Acop.
Daytoy ti kinumpirmaran ni Deputy Speaker Ronaldo Puno a longtime friend ni Acop.
Inbatad ni Puno a ti ipupusay ni Acop ket nangitunda ti nakaro a ladingit iti kongreso ken iti intero pagilian.
Iti mensahe nga inpatulod ni Rep. Puno iti Bombo Radyo, ni Acop ket ket dimmalan iti naballigi a kidney transplant idi Nobyembre 28 ken nasayaaten ti kondisyon na kalpasan ti operasyon.
Agpapaimbag laengen ken in-inoten a makabangon isut gapuna a nagbalin a positibo dagiti kakadwa na iti kamara de representantes ken mangnamnama da a makasubli iti trabaho na iti kabiitan a panawen.
Nupay kasta, bigla lattan a naatake iti puso ni Rep. Acop a nangitunda ti pannakatay na.
Segun ken ni Deputy Speaker Puno, nasurok a 25 ta tawen a nakadwa ken nakatrabaho na ni Acop, nga inladawan na kas napudno, natured ken nadalos ti panagserbina kadagiti Pilipino.
Innayon na a dakkel a pukaw para iti kongreso ken iti pagilian ti pannakapukaw ken niRep. Acop, aglalo iti kangitingitan ti panagserbina ken dagiti adbokasiya na para iti kinaurnus ken pagsayaatan dagiti umili.
