LAOAG CITY – Inalerto ti Department of Health (DOH) ti Centers for Health Development kageddan ti panagngato ti kaso ti Hand, Foot and Mouth Disease (HFMD) ditoy pagilian.
Basar iti datos ti Department of Health, dumanon iti 1,517 ti nakaptan ti nasao a sakit iti umuna a tallo a lawas ita a tawen.
Nangatngato ti 23% maidasig kadagiti nairekord iti kapada a panawen iti napalabas a tawen.
Segun iti Department of Health, ti Hand, Foot and Mouth Disease ket maikonsiderar a Category 1 wenno immediately notifiable disease.
Gapu iti daytoy, masapol nga i-monitor dagiti Centers for Health Development ti panagwaras ti sakit tapno malappedan daytoy.
Naammoan a dagiti sumagmamano nga addang a maaramid ket ti report ti local Epidemiology and Surveillance Units para kadagiti suspected a nakaptan daytoy ken dagiti confirmed cases.
Masansan a makapkaptan ti Hand, Foot and Mouth Disease dagiti ubbing nga agtawen ti lima ken agpababa.
Maiyakar ti sakit kadagiti indibidual iti babaen ti direct contact.
