LAOAG CITY – Manamnama nga agpokus iti agdama a global economic challenges nga agbalin a kangrunaan a mapagsasaritaan ti Asia-Pacific Economic Cooperation (APEC) Leader’s Meeting inton Oktubre.
Agkikita dagiti lider manipud kadagiti 21 a miembro ti Asia-Pacific Economic Cooperation idiay South Korea.
Napateg ti panagtitipon kabayatan nga agtultuloy a sumangsango ti rehion kadagiti karit iti negosio, digital a panagbalbaliw ken pagannurotan.
Mainaig iti daytoy, manamnama ti bilateral sidelight meetings pakairamanan ti panagkita da United States President Donald Trump ken Chinese President Xi Jinping.
Inbatad ni Eduardo Pedrosa ti Asia-Pacific Economic Cooperation Secretariat, pammaneknek daytoy iti kinapateg ti Asia-Pacific Economic Cooperation kas plataporma ti dayalogo ken kooperasion.
Maisayangkat ti taripnong iti babaen ti tema a “Building a Sustainable Tomorrow: Connect, Innovate, Prosper.”
Naammoan nga umuna nga agtataripnong dagiti ministro ken senior officials manipud inton Oktubre 27 agingga iti Nobiembre 1 iti Gyeongju.
Target dagiti lider nga itandudo ti Asia-Pacific Economic Cooperation Putrajaya Vision 2040 ken Aotearoa Plan of Action para iti ad-adda nga inklusibo ken natibker a panagdur-as.
