LAOAG CITY – Inbatad ni Dr. PJ Bengwasan, Child Psychotherapist ken Clinical Psychologist iti Saint Louis University a naruay dagiti agus-usar ti internet.
Kuna na a daytoy ti us-usaren ti kaaduan tapno maaddan ti komunikasyon ken pannakilangen iti sabali a tao a kas iti social media.
Inbatad na a malaksid iti daytoy ket mausar pay ti internet iti nagduduma nga aktibitidad iti trabaho, pagadalan ken entertainment.
Nu pay kasta, inbaga ni Bengwasan a ti nalabes a panagusar ti internet ket adda ti nagduduma nga epekto na iti maysa nga indibidual kangrunaan kadagiti ubbing.
Kuna na a kangrunaan a makitkita iti internet ket isu ti tuladen dagiti ubbing nga isu ti posible a mangitunda pay kadagitoy iti risgo.
Inpakaammo na a nu maipanggep iti social skills, agduma ti pannakilangen dagitoy iti personal ken babaen iti social media laeng.
Kabayatanna, patien ni Bengwasan a saan a ti internet ti kangrunaan a rason iti pannakapasar ti depresyon ti maysa nga indibidual.
Immunan nga inpakaammo ni Bengwasan a basar kadagiti panadagal ket maysa oras laeng iti maminsan iti maysa a lawas ti masapol a panagusar dagiti ubbing ti internet.
Mainaig iti daytoy, kuna ni Bengwasan a napateg a mamonitor ti panagusar dagiti ubbing ti internet tapno maliklikan iti aniaman a risgo iti salun-at ken mental health dagitoy.
Immunan a rimuar iti resulta ti panagadal ni Zentaro Yamagata, maysa a propesor iti social medicine iti University of Yamanashi ken dagiti dadduma pay a kakadua na nga iti panagusar ti internet dagiti junior high school students ken addaan ti sintomas ti online addiction ket basbassit ti oras da iti panagbasa, pisikal nga aktibidad ken panagturog.
