LAOAG CITY – Arigna awanen ti panagsardeng dagiti kanalbuong iti ciudad ti Kyiv a kabisera ti Ukraine kalpasan a nakastrek dagiti tangke ti Russia iti nasao a lugar iti kaunaan a gundaway.
Gapu iti daytoy, nagpanawagan ti Ministry of Defence iti Ukraine kadagiti agnanaed iti lugar a bombaen dagiti tangke ti Russia tapno masubbot dagiti kabusor.
Immun-una iti daytoy, inrakurak ti European Union (EU) a nangipataw da ti baro a sanctions tapno mai-freeze dagiti personal assets ni Russian President Vladimir Putin idiay Europe.
Kabayatanna, inwaragawag met ti Kremlin a nakasagana ti Russia a makisarita iti Ukraine.
Inbatad ni Spokesman Dmitry Peskov a gagem ti Russia nga ideklarar ti Ukraine ti “neutral status” a pakairamanan ditoy ti “demilitarisation”.
Kalikagom ti Russia a saan a makipartisipar wenno makipagpaset ti Ukraine iti NATO.
Namin-ado metten a daras a nagpanawagan ni Ukrainian President Volodymyr Zelensky para iti panagsarita da ken ni Putin ngem agpapan ita ket awan pay ti inted a senyales ti Russian Presidente no kayat na ti makipagsarita maibasar iti “demilitarisation”.
