LAOAG CITY – Naragsak nga inburay ti aktres a ni Arlene Muhlach ti panagturpos daytoy iti kolehio iti tawenna a 55.
Iti online account ti aktres ket nag-post daytoy kadagiti ladawan iti panagturposna iti kolehio.
Naisayangkat ti graduation rites iti Philippine International Convention Center (PICC) ket nagturpos isuna iti degree ti Bachelor of Arts in Communication manipud iti Philippine Women’s University.
Inbatadna a nagsardeng daytoy iti 3rd year college tapno matutukan ti showbiz career ken ti pamiliana.
Nagyaman isuna kadagiti professors ken dagiti kaklasena iti Expanded Tertiary Education Equivalency and Accreditation Program (ETEEAP) gapu iti pammatida iti kabaelan ken abilidadna.
Kabayatanna, nagsasaruno met ti nabara a kablaaw kenkuana manipud iti showbiz industry.
