LAOAG CITY – Inpasingked ti Armed Forces of the Philippines (AFP) nga agtalinaed a napudno da iti gobierno ni Presidente Ferdinand Marcos Jr.
Segun ken ni Capt. Bryan Albano, Civil Military Operations Officer ti 501st Infantry “Valiant” Brigade, adda da laeng iti likudan ni Presidente Marcos ken kabaelan da a protehiran ti soberenya ti Pilipinas.
Kuna na a agtalek da iti Armed Forces of the Philippines (AFP) chain of Command no sadinno a ti commander in chief da ket ni Presidente Marcos.
Mainaig iti daytoy, inbatad ni Albano a no maipapan iti maipagarop a destabilization plot kontra ken ni Presidente Marcos, inlawlawag na nga iti kada indibidual ket adda ti karbengan na a mangipaay ti opinyon na.
Nupay kasta, inpetteng ni Albano nga adda amin ti pagpatinggaan ti panangipaay ti opinyon kangrunaan na no maapektaran metten ti karbengan ti sabali a tao kangrunaan na no awan ti kinapudno na ken awan ti ebidensya.
Immunan nga adda dagiti nagwaras a damag iti online babaen kada Johnny Macanas ken Clemente “Dado” Enrique, a maipagarop nga agpada a dati a kameng ti Armed Forces of the Philippines a maipagarop nga adda ti plano ti armada ken Philippine National Police a mangpababa iti pwesto ken ni Presidente Marcos.
Iti baet daytoy, inpakaammo ni Albano a saan a basta mapatawan ti pannusa dagiti maseknan gapu ta masapol a masurot ti due process agingga a mapaneknekan no dagitoy ket guilty wenno saan.
