LAOAG CITY – Mangipatungpal ti regular a deployment dagiti barko ken helicopter ti Armed Forces of the Philippines iti West Philippine Sea.
Daytoy ket para iti regular a panangiyuswat ti Maritime ken aerial patrol ti Armed Forces of the Philippines iti lugar iti baet ti ipatpatungpal nga unilateral fishing ban ti China.
Segun ken ni Armed Forces of the Philippines Spokesperson Col. Francel Margareth Padilla, gagem daytoy a masigurado ti kinatalged ken seguridad dagiti Pilipino a mangngalap a mapan agkalap iti West Philippine Sea.
Maipalagip nga immunan nga inpetteng ti Armed Forces of the Philippines a saanna a bigbigen ti baro a pronouncement ti China mainaig iti panangipatungpal na ti fishing moratorium iti West Philippine Sea a nagbalin nga epektibo sipud idi Mayo 1, 2024 ken agpaot agingga intono Setyembre 16, 2024.
Kagiddan daytoy ket naiget a panangkondenar ti Armed Forces of the Philippines gapu ta ibilang na a ti nasao nga addang ti China ket dakkel a panaglabsing iti Maritime claims ti Pilipinas iti babaen ti United Nations Convention on the Law of the Sea ken 2016 Arbitral decision.
