LAOAG CITY – Pinatgan ti Manila Regional Trial Court Branch 30 ti kiddaw ni dati a Rep. Arnolfo Teves Jr. a makapagpiyansa kadwa na ti dua a pada na nga akusado mainaig iti sangsangwen da a kaso.
Basar iti 27 a pinanid a resolution nga insurat ni Presiding Judge Ryan Philippine L. Bartolome, napalubusan a makapagpiyansa ni Teves ti P500,000 idinto a sag-P250,000 met kada Richard Cuadra ken Rolando Pinili.
Maipalagip a dagiti tallo nga akusado ket maibilang nga adda iti likudan ti pannakapapatay ni Pacito Libron idi Hunyo 23, 2019 iti Bayawan City no sadinno a napaltu-paltugan daytoy agingga a natay.
Rumrumuar a ti hitman ken bodyguards ni Teves ti nangpaltog ken ni Libron ken dagitoy ket nakasoan ti murder iti RTC Manila.
Malaksid iti sangsangwen da a kaso a murder, adda pay ti dadduma a kasong kriminal ni Teves a nakapenpen iti korte kas ti illegal possession of firearms and eplosives, panaglabsing ti Terrorism, Financial Prevention and Suspension act.
Immunan a napaawan basol ni Teves iti Manila RTC iti kaso a murder kalpasan nga inawat da ti naipila a demurer to evidence.
