LAOAG CITY – Naragsak nga inpakaammo ni Mr. Rene Castillo, Technical Official ti Arnis ti Palarong Pambansa 2023 a nakagun-od ti Laoag City ti bronze medal iti ay-ayam nga arnis.
Inlawlawagna a daytoy ti umuna a gundaway a nakagun-od ti medalya ti Laoag City sipod nabukel ti Arnis Team ditoy siudad ti Laoag.
Inbatadna a nagbalin a naiget ti panagbibinnalubal iti nasao nga ay-ayam nangnangruna kadagiti umaayam manipod iti Cagayan Valley, Region 3, Region 6, Davao Region, National Capital Region, CALABARZON, Northern ken Western Visayas.
Kunana a babaen iti daytoy naindaklan a kompetisyon ket agbalin a dakkel nga adal para kadagiti maseknan nga umaayam ti kapadasanda a mabalindanto nga iyaplikar iti sumaruno nga ay-ayam dagitoy.
Inpalgakna nga idi immuna a gundaway ket dua laeng nga umaayam ti arnis ti nangiprisentar ti Laoag City idiay Davao City.
Nupay kasta, inbunannag ni Castillo nga iti daytoy met maikadua a gundaway ket adda ti uppat nga arnis players ti nakipartisipar no sadino tallo dagiti lallaki ken maysa a babai nga agpapada dagitoy nga agad-adal iti Ilocos Norte College of Arts and Trades.
Mainaig iti daytoy, kunana nga iti laksid ti naiget a laban dagiti umaayam iti arnis ket awan ti nagsagaba ti serious injury kabayatan ti panagay-ayam dagitoy.
Innayonna a nagun-od ti atleta manipod iti Pangasinan ti balitok a medalya.
Kabayatanna, naammoan nga iti daytoy nga aldaw ket manamnama nga agawiden dagiti maseknan nga umaayam ti arnis ditoy pronbisia.
