LAOAG CITY – Inpakaammo ni Fire Inspector Edison Reyes, City Fire Marshal ti Bureau of Fire Protection ditoy siudad ti Laoag a tumulong ti Arson Investigator ti Bureau of Fire Protection – Ilocos Norte iti panangimbestigar iti pannakauram ti 9 a pasdek negosio iti Barangay 16 ditoy siudad ti Laoag.
Inbatadna a babaen iti daytoy a wagas ket ad-adda a makita ken maduktalan dagiti otoridad ti pudno a namunganayan ti uram.
Inlawlawagna a basar iti nagbalin nga imbestigasion ti Arson Investigation ti Bureau of Fire Protection – Ilocos Norte ket rumrummuar a ti nagrugian ti uram ket iti maikadua a kadsaaran ti maysa a construction supply no sadinno nga aggapu iti maysa a saksakan nga asideg iti ridaw daytoy.
Nupay kasta, kunana a manarimaan pay laeng ti naun-uneg a panangimbestigar dagiti otoridad iti naan-anay a napasamak nga insidente.
Maipalagip a mapattapatta a dumanon iti sumurok-kumurang a 20 a milyon a pisos ti balor dagiti nadadael iti pannakauram ti siam a pasdek negosio iti Barangay 16 ditoy siudad ti Laoag.
Immuna iti daytoy, nangrugi ti uram iti maysa a paglakoan kadagiti construction supplies agingga a nagramram ti dakkel nga apoy kadagiti kaabayna a pasdek negosio kas ti paglakoan ti motorcycle parts, ace marketing, barber shop, shoe shop, school supplies, eye clinic ken law office.
