LAOAG CITY – Nagyaman ti asawa ni Charlie Kirk a ni Erika Kirk kadagiti first responders a pinadasda nga isalbar ti biag ti asawana kalpasan a napaltogan a nangitunda ti pannakatayna iti Utah university campus.
Iti panagbitlana, inrakurakna nga agtalinaed ti boses ti asawana kadagiti itantandudona a programa ken aktibidad.
Basar iti post-na iti Instagram, inpakitana dagiti sumagmamano a ladawan ken videos a nakatugaw iti asideg ti lungon ti asawana no sadinno ditoy a nabuya ti panangbisongna iti ima ti asawana.
Inbatadna a saanna pay a masinunuo no kasanona nga ilawlawag kadagiti dua nga annakda nga agtawen ti tallo ken maysa ti kellaat a pannakatay ti asawana.
Mainaig iti daytoy, ni Erika Kirk ket maysa a negosiante ken dati a Miss Arizona USA winner a nagam-ammoda ti asawana idi 2018 ken na-engaged dagitoy idi 2020 ken nagkasarda iti mabiit.
Manarimaan nga agad-adal iti doctorate in Bible studies ni Erika ken nangirubuat ti ministry programme ken host iti Midweek Rise Up podcast a nakapokus iti Biblical leadership.
Naammoan a basar iti Turning Point USA, ti organisasion a co-founder ni Kirk, maisayangkat ti memorial service inton Septiembre 21 iti State Farm Stadium idiay Arizona a mabalin a makaakomodar ti sumurok 60 a ribu nga indibidual.
Maipalagip a natay ni Charlie Kirk kalpasan a pinaltogan ti suspek a ni Tyler Robinson kabayatan ti open-air speaking event iti Orem.
