LAOAG CITY – Mamati ni Mrs. Saniata Bautista nga adda ti pakainaiganna iti pannakipallot ti asawana a ni Mr. Emerson Bautista, agtawen ti 34 maysa a construction worker ken residente ti Barangay Caray iti ili ti Nueva Era iti napasamak kenkuana.
Segun kenkuana, daytoy laeng ti mapanpanunotna a rason iti pannakapapatay ti asawana gapu ta awan met ti malagipna a nakaririna wenno nakabasolanna iti kallabes.
Nupay kasta, inlawlawagna a naobserbaranna nga alisto a makapungtot ti asawana kadagiti naglabas a lawas gapu ta inungtanna ti inauna nga anakda kalpasan a nabayag a napan gimmatang kadagiti kanen dagiti tarakenna a manok a para pallot.
Kunana a mamindua a daras iti uneg ti maysa a lawas a makipalpallot ti asawana partikular iti aldaw ti Huebes ken Domingo.
Inbatadna a saan a kayat ti asawana ti masansan a panagsaludsod kenkuana gapu ta saanna a kayat nga agproblema, agdanag ken adda ti pagsinnungbatanda nga agasawa.
Kalikagumna a kasarita dagiti kakadua ti asawana a makipalpallot tapno ad-adda a malawlawagan ti panunotna maipanggep iti napasamak.
Mainaig iti daytoy, kuna ni Mrs. Bautista a mapan agibelleng kadagiti basurada ti asawana a nakalugan ti kurong-kurong idi a kellaat a pinaltu-paltogan isuna dagiti saan pay a nabigbig a suspek iti barukong ken ulona a puon ti pannakatayna.
Innayonna a mangnamnama daytoy a magun-od ti hustisia iti kabiitan a panawen.
Naammoan nga adda ti dua nga annak ti napanawan ti biktima nga agpada a lallaki nga agtawen ti 13 ken 2.
Maipalagip a naitaray ti biktima iti Rural Health Unit iti ili ti Nueva Era ngem naiyakar daytoy iti Doña Josefa Mariano Marcos Memorial Hospital iti ili ti Marcos no sadinno a ditoy a naideklarar a dead on arrival babaen ti attending physician.
Immuna iti daytoy, narekobre dagiti otoridad ti tallo nga empty shells ti calibre .45.
Iti agdama, agtultuloy a mangiwaywayat ti naun-uneg nga imbestigasion dagiti otoridad mainaig iti insidente.
