LAOAG CITY – Inaprubaran ti Association of Southeast Asian Nations Chiefs of Police (Aseanapol) ti pannakabukel ti maysa a task force kontra iti online scam iti rehiyon.
Kalpasanti aika-44 nga Aseanapol Conference iti Pasay City, inbatad ni PNP chief Gen. Jose Melencio Nartatez Jr. a karman iti programa ti panagbisit kadagiti national ati-scam centers ken pannakaipatungpal ti regional plan of action kontra iti scam-related crimes.
Kunana a ma-implementar ti anti-scam hub iti tunggal pagilian tapno mapapigsa ti koordinasion kontra kadagiti online scam a umab-abot iti nagduduma a pagilian.
Immunan nga inbatad ti Philippine National Police (PNP) a makikokoordinar daytoy kadagiti otoridad tapno maduktalan dagiti recruiter ken financier dagiti job scam ken human trafficking iti nagduduma a pagilian.
Kabayatanna, inrakurak ti Philippine National Police (PNP) Anti-Cybercrime Group (ACG) a bimmaba dagiti online scam cases manipud Enero agingga Hunio 2026 no ikumparar iti kapada a panawen idi 2025, gapu iti nangato a pannakaimpormar kadagiti publiko a resulta dagiti information campaigns.
