LAOAG CITY – Naiget ti panagbantay dagiti opisyal ti barangay kadagiti entry and exit points iti ili ti Sarrat.
Daytoy ti inpakaammo ti local chief executive iti nasao nga ili kalpasan nga adda dagiti nairekord a nagpositibo to African Swine Fever Virus iti ili ti Vintar.
Kuna ti mayor nga apaman a nadamag da daytoy ket insigida da a nakisarita kadagiti opisyal ti barangay nangruna kadagiti asideg ti border tapno mabantayan ken masigurado a dagiti maiserrek a karne ti baboy iti ili da ket natalged nga ipauneg.
Innayon na a kastoy met laeng ti inaramid da iti kallabes kalpasan nga adda dagiti nagpositibo ti African Swine Fever virus iti ciudad ti Batac ken iti ili ti San Nicolas.
Mainaig iti daytoy, inpakaammo ti opisyal a babaen kadagiti checkpoint ket nalapdan dagiti nanggandat nga agilabas wenno agipagna ti karne ti baboy iti ili ti Sarrat gapu ta nakurang ti document dagitoy.
Iti agdama, naragsak nga inpakaammo ti opisyal nga awan dagiti taraken a baboy a nagpositibo iti African Swine Fever virus ili ti Sarrat kalpasan ti panangisayangkat ti Provincial Veterinary Office ti random test iti nagduduma a barangay iti nadakamat nga ili.
