LAOAG CITY – Dakkel ti epekto na ti maipadpadamag nga African Swine Fever (ASF) iti panaglako dagiti “meat vendors” ti karne ti baboy ditoy ciudad ti Laoag.
Segun kenni Mr. Rommel Nanay, maysa kadagiti aglaklako iti merkado publiko ditoy ciudad ti Laoag, awan unay ti aggatang ti karne ti baboy sipud naipadamag ti ASF ken dimmegdeg idi adda ti nakumpiskar a “pork skin” iti terminal ti maysa a bus.
Daytoy ket gapo iti panagamak dagiti customers ken panagsigurado da.
Inbatad na pay a gapo iti sakit ket ad-adda manen a rimmigat ti panaglako da ti karne ti baboy ken bimmaba pay ti bilang dagiti parpartyen da maipud iti uppat ket nagbalin laengen a dua.
Nupay kasta, inpasigurado ni Nanay a natalged dagiti lako da a karne ti baboy gapo ta ditoy met laeng probinsya ti paggapuan na ken saan da nga agang-angkat, kasta pay ti kinaiget dagiti inspector a mangkita no natalged dagiti karne a mailaklako iti publiko.
Kabayatanna, inbatad ni Mr. Pricilo Pinera, maysa kadagiti addaan ti meat shop ditoy ciudad ti Laoag a bimmaba ti panaglako na ti kada kilo ti karne ti baboy.
Daytoy ket gapo ta bimmaba met ti presyo ti panaggatang na kadagiti “backyard raisers”.
Segun kenni Pinera, idi nagipababa ti presyo dagiti paggatgatangan na ti baboy ket inpababa na ti 10 a pisos ti panaglako na manipud iti dati a presyo a 195 a pisos.
Kabayatanna, kuna ni Pinera a posible nga iti sumaruno nga uppat a bulan ket mabalin nga adda ti panagkurang ti suplay ti karne gapo ta napabutngan dagiti agtartaraken.
