LAOAG CITY – Naragsak nga inpakaammo ni Dr. Samantha Licudine, City Veterinarian ditoy siudad ti Laoag nga awan ti nairekord a kaso ti African Swine Fever Virus (ASF) virus ditoy siudad.
Inbatadna a naiget ti pannakikammayetda kadagiti Barangay Animal Health Workers ken dagiti Agriculturist tapno maipasigurado a saan a sumrek ti virus ditoy siudad ti Laoag.
Inlawlawagna a masansan a bumisbisitada kadagiti mannalon tapno masaludsod kadakuada ti agdama a situasion kadagiti tarakenda a baboy.
Kunana a naiget met ti pannakaiserrek kadagiti baboy ditoy siudad ti Laoag nangruna kadagiti maikabil iti Slaughter House.
Innayonna a babaen iti daytoy a wagas ket ad-adda a maprotektaran dagiti amin nga agtartaraken ti baboy iti intero a siudad ti Laoag.
