LAOAG CITY – Inlawlawag ni Provincial Veterinarian Dr. Loida Valenzuela a dagiti ASF-free farms ditoy probinsya ket saan a mabalin a gumatang ti baboy kadagiti backyard hog raisers ken iti ruar ti probinsya.
Kuna na a daytoy ket tapno agtalinaed nga umdas ti suplay ti karne ti baboy ditoy probinsya ken saan a ngumato ti presyo daytoy.
Innayun na a daytoy ket wagas pay tapno maprebentaran ti panagserrek ti agraira a sakit dagiti baboy wenno ti African Swine Fever nga immunan a nakita idiay Leyte.
Nu pay kasta, inpakaamo ni Valenzuela a masapol nga agipasa ti requirements wenno ti estado dagiti ASF-Free Farms iti kada 21 nga aldaw tapno mamonitor dagiti baboy nu awan ti virus dagitoy.
Inbunannag na a nu saan a makaipasa ti maysa nga ASF-free farm ket maipasardeng ti panagtaraken daytoy ti baboy.
Mainaig iti daytoy, kuna Valenzuela nga addan ti dua a farm ti naipasardeng gapu iti saan na a panagipasa ti requirement para iti maibilang nga ASF-free farm.
Immuna iti daytoy, inpakaamo ti provincial health veterinarian nga itay napan a lawas ket adda ti saan a naaprubaran a papeles ti maysa nga ASF-Free farm nga agipaay ti maparti a baboy ditoy probinsya gapu ta kwestionable dagiti matartaraken a dingwen.
