LAOAG CITY – Maysa a ‘Christmas miracle’ ti napasamak iti maysa a pamilia idiay Florida, U.S.A. idi a ni Athena, agtawen ti uppat a German Shepherd-Husky mix ket nakasubli ken nagusar ti doorbell tapno ipakaammo ti panagawidna kalpasan a mapukpukaw ti siam nga aldaw.
Napukaw ni Athena manipud iti pagtaenganda iti Green Cove Springs idi Disiembre 15.
Iti baet ti awan sarday a panangbirbirok ti pamilia ken ti kaarrubada, saanda a nasapolan ti aso.
Nupay kasta, idi 2:30 ti parbangon iti bisperas ti paskua, nakigtot ti akinkukua a ni Brooke Comer idi nangngegna ti doorbell.
Idi kitaenna ti Ring camera, nakitana ni Athena a pinpindoten ti doorbell.
Nagbalin nga emosyonal ti naminsan manen a panagkitada. Immarakop ni Athena kadagiti amona. Kalpasanna ket naragsak daytoy a nagay-ayam ti paboritona a bola.
Naammoan a tapno maliklikan iti kapada nga insidente iti masangoanan, ipa-microchip ti amo ti asoda.
