LAOAG CITY – Kinumpirmaran ni Barangay Kagawad Rey Balicoco, chairman ti Committee on Agriculture iti Barangay San Mateo ditoy ciudad ti Laoag a 14 laeng a sako ti abuno ti naideliver iti balor a 40,000 pesos.
Segun kenni Balicoco, daytoy ti rason no apay a nagreklamo dagiti miembro ti asosasyon dagiti mannalon gapo ta agparparang a 2,850 pesos ti maysa a sako idinto a ti dati a panaggatang da ket 1,650 pesos laeng.
Ummuna iti daytoy, nagreklamo dagiti mannalon gapo ta maipagarop a nangina unay ti presyo ti abuno isut gapo na pinayaban ni Barangay Chairman Dante Agustin ti supplier.
Kunana a ti inbaga ti supplier kadagiti mannalon ken iti konseho ket gagangay ken ditoy a nagkiddaw ti asosasyon da a manayunan iti dua agingga iti uppat a sako.
Inbatad na a ti naideliver nga abuno ket su ti nagbibingayan dagiti 33 a miembro ti asosyasyon da ken ti pondo a nausar ket pondo ti barangay nga “Aid to Farmers.”
Inlawlawag na a nakigtot da pay gapo ta ti supplier ket maipagarop a ti Presidente dagiti Treasurers ditoy ciudad ti Laoag ken isu met laeng ti supplier iti ummunan a naireklamo a nabayag a naideliver a janitorial supplies ti barangay da.
Malaksid iti daytoy, kuna ni Balicoco nga awan ti nakita na a resibo gapo ta idi dawaten na kadagiti napan nagdeliver ket “narecieve dan” ti sungbat laeng dagitoy.
Innayonna a saan nga isuna ti nangiproseo iti pannakagatang kadagiti abuno no diket ti kapitan ken treasurer.
