LAOAG CITY – Naminpinsanen nga ipawil ti estado ti Assam iti India ti panagipauneg ti karne ti baka iti pampubliko a lugar a pakairamanan dagiti restaurants ken nagduduma nga aktibidad.
Daytoy ket paset ti pannakaipalawa ti pagannurutan a manglimitar iti panaglako ti baka iti asideg ti sumagmamano a religious places kas kadagiti templo.
Nupay kasta, inrakurak ni Chief Minister Himanta Biswa Sarma a mabalin latta ti aglako ken gumatang manipod kadagiti shops ngem masapol a kanen daytoy iti uneg ti balay wenno dagiti pribado nga establisimiento ti estado.
Ti panagipauneg ti baka ket sensitibo nga isyu idiay India gapu ta ti baka ket raraemen wenno pagrukrukbaban dagiti Indu, a buklen ti 80% iti populasyon ti pagiluan.
