LAOAG CITY – Itultuloy ti Independent Commission for Infrastructure -Technical Working Group for Asset Recovery ti mangpasubli kadagiti natakaw a pondo ken sanikua manipod kadagiti karaman iti maanomalya a flood control projects.
Daytoy ket uray agleppasen ti operasyon ti mismo nga Independent Commission for Infrastructure (ICI) intono Marso 31, 2026.
Segun ken ni Independent Commission for Infrastructure-Technical Working Group chairperson USec. Renato “Aboy” Paraiso, saan pay a nakaawat ti grupo ti pormal nga anunsiyo wenno direktiba manipod iti komisyon aglalo iti mismo a chairman na a ni retired Justice Andres Reyes Jr. a nangirekomendar nga ileppasen ti komisyon dagiti operasyon na.
Nupay kasta, immunan a nangirakurak ti suporta ti agpada nga Office of the Ombudsman ken Office of the Solicitor General para iti agtultuloy a technical working group tapno marekobre dagiti natakaw a sanikua.
Segun kenni USec. Paraiso, addan dagiti naestablisar da a mangipaay ti direksyon iti gobierno tapno marekobre dagiti sanikua a maipagarop a konektado iti maanomalya a proyekto.
Nupay kasapulan ti nalawa nga imbestigasyon ti proseso ken panangtuntun no sadinno ti pakaiyakaran dagiti nasao a sanikua, mamati ni USec. Paraiso nga addan ti naaramid a progreso ti grupo.
Basar ti kaudian a datos a natratar iti panagtataripnong da, umaboten iti P4.8 billion ti balor dagiti narekobre ken na-freeze nga assets.
