LAOAG CITY – I-freeze amin ti gobierno dagiti assets ni suspended Negros Oriental Rep. Arnolfo Teves ken dagiti 12 a sabsabali pay a naideklara kas terorista babaen iti Anti-Terrorism Council (ATC).
Ni Teves ken ti kabsat na a ni Pryde Henry Teves, ken dagiti 11 a sabsabli pay ket naideklara kas terorista babaen iti Resolution 63 gapo iti maipagarop a pannakainaig da iti pannakapapatay ni Negros Oriental Gov. Roel Degamo ken dadduma pay a political killings iti nasao a probinsya.
Segun kenni Anti-Money Laundering Council legal officer Luis Anthony Warren, ti terrorist tag ket mangipalubos kadakuada nga otomatiko nga i-freeze dagiti assets dagitoy kas nailanad iti Section 25 iti Republic Act (RA) 11479 wenno ti “Anti-Terror Act.”
Inbatad na a nangisyu ti Anti-Money Laundering Council ti freeze order basar iti basao a linteg no sadinno kalpasan ti pannakabigbig ti maysa nga indibidual wenno organisayon kas terorista, parte iti trabaho ti Anti-Money Laundering Council a mangiparuk-at met ti ex parte order para iti daytoy.
Ti Anti-Money Laundering Council, maysa a member agency iti Anti-Terrorism Council, ket addaan pay ti bileg a mangtarget ti terrorist accounts babaen iti RA 10168 ti Terrorism Financing Prevention and Suppression Act of 2012.
