LAOAG CITY – Mangrugi inton bigat, Marso 15 iti agdama a tawen ti pormal a pannakaisayangkat ti AstraZeneca vaccine rollout ti Mariano Marcos Memorial Hospital and Medical Center iti Siudad ti Batac.
Daytoy ti kinumpirmaran ni Mr. Jhey-ar Mangati, ti Health Education ken Promotions Officer iti nasao nga ospital.
Segun kenkuana, umabot ti 80 doses ti AstraZeneca vaccines ti naawat ti ospital a mausar iti panagpabakuna kadagiti health care workers.
Inbatadna a dagitoy a doses ket nairanta a naituding para kadagiti medical practitioners nga agtawen ti 60 agpangato.
Inlawlawagna nga itay kallabes ket adda ti timpuar a damag a ti AstraZeneca vaccines ket napinpintas ken nasaysayaat para kadagiti senior citizens maidasig iti sabali a klase ti COVID-19 vaccine.
Maipalagip a ni Dr. Isaias Alipio Jr., mangidadaulo ti Department of Physical Medicine and Rehabilitation ti maysa kadagiti immuna a nabakunaan usar ti British-made AstraZeneca vaccine iti tawenna nga 61.
Immun-una ngem iti daytoy, balligi met a nabakunaan dagiti 750 a health care workers ti MMMH&MC usar ti Chinese-brand SinoVac vaccines nga inted ti Department of Health.
