LAOAG CITY – Kalikagum ni Atty. Donato Balderas Jr., Schools Division Superintendent ti Department of Edcation – Ilocos Norte a madeterminar ti road map wenno straight line tapno maipasigurado ti kinatalged ti learning environment.
Rakurak daytoy ti Schools Division Superintendent ti Department of Edcation – Ilocos Norte kalpasan ti naisayangkat nga Inter-Agency Interface nga inatendaran dagiti mangisursuro, barangay officials, Parents and Teachers Association, kameng ti Ilocos Norte Police Provincial Office, Supervisors kadagiti nagduduma a pagadalan ken dagiti opisial ti departamento.
Segun ken ni Atty. Balderas Jr., babaen iti daytoy ket mabalinda nga irubuat dagiti nagduduma a programa kas ti pannakaitandudo ti literacy, mental health ken dadduma pay.
Inbatadna a masapol ti naan-anay a panagsagsagana dagiti mangisursuro tapno napinpintas met laeng ti pannakaipadanon dagiti adal kadagiti estudiante.
Inlawlawagna a kasapulan a matagiben ti career development dagiti mangisursuro kas ti pannakai-promote dagitoy iti panangisuroda.
Kunana a napateg ti pannakikammayet iti komunidad ken pannakibinnulig kadagiti stateholders para iti nadurdur-as nga edukasion ditoy probinsia.
Kabayatanna, inpakaammo ni Balderas Jr. a nangaramidda pay ti listaan dagiti topiko ken sumagmamano nga exercises a pakapidutan ti adal dagiti estudiante babaen iti asynchronous learning system.
