LAOAG CITY – Umabot ti innem a pulo agingga iti innem a pulo ket lima nga atleta ti ipatulod ti gobierno probinsial ti Ilocos Norte a makipartisipar iti Batang Pinoy National Championships idiay Metro Manila.
Segun ken ni Mr. Faivo Bartolome, Sports Development Consultant ti gobierno probinsial, dagiti mangbukbukel iti delegasyon ti probinsia ket dagiti nangab-abak kadagiti kallabes a regional ken national competitions.
Inbatadna a dagiti napili ket dagiti maibilang a kalalaingan kadagiti kabukbukudanda nga event.
Inlawlawagna a karaman kadagiti ay-ayam nga adda dagiti mangibagi iti probinsia ket ti archery, arnis, badminton, table tennis, lawn tennis, pencak silat, wushu, wrestling, sepak takraw ken taekwondo.
Kunana a maibilang a “One Ilocos Norte” ti delegasyon ti probinsia wenno naggapo kadagiti nagdumaduma nga ili ken iti dua a siudad ditoy probinsia dagiti mangibagi iti probinsia.
Impatalged ni Bartolome a naan-anay ti suporta nga ipapaay ni Gob. Matthew Marcos Manotoc kadagiti nadakamat nga atleta kas ipamatmat ti panangala ti probinsia kadagiti nalalaing a coaches a mangsanay kadagiti atleta bayat ti panagsagsaganada para iti Batang Pinoy National Championships.
Innayonna a mangrugi ti nasao a panagsanay inton bigat, Oktubre 22 agingga a madanon ti panagturongda idiay Manila.
