LAOAG CITY – Naragsak nga inpakaammo ni Mrs. Helen Rose Domingo, mangidadaulo ti Provincial Sports and Development Office a napili ti maysa nga atleta ditoy probinsia a mangbukel ti baseball group a mangibagi ti pagilian iti international competition a maiyuswat idiay Japan.
Binigbigna daytoy a ni Gerick Flores a taga ili ti Currimao.
Inbatadna a kabayatan ti pannakaisayangkat ti Little League Baseball ditoy probinsia ket nairana nga immatendar dagiti coach ti national team a Philippine Amateur Baseball Association.
Inlawlawagna a ditoy a nakitada nga adda potensial ti dadduma nga agbalin a paset ti national team.
Kalpasan iti daytoy, kuna ti mangidadaulo ti Provincial Sports and Development Office nga inkiddawna nga bigbigenda dagitoy ken suportaranda tapno maka-try out.
Naammoan a kabayatan ti try out ket karaman ni Flores iti Top 10 a napili.
Iti agdama, adda idiay Laguna ti nasao nga atleta ken manamnama a mangibagi ti pagilian iti mapaspasangasangan nga international competition inton Nobiembre 22 idiay Japan.
