LAOAG CITY – Naburak ti tallo a rekord ni Titus Rafael Sia manipud iti National Capital Region (NCR) iti swimming competition ti Palarong Pambansa 2025 ken agdama nga addaan ti lima a balitok a medalya.
Naminsan manen a nagpabilib ni Titus kalpasan ti record-breaking performance iti 400-meter freestyle no sadinno a nakairekod isuna ti 4:31.39, napaspaspas maidasig iti dati a rekord a 4:35.42 ni Omar Dacera ti Davao Region sipod pay idi 2009.
Naammoan a ti personal a target-na ket ti 4:29, kunana a kuntento daytoyen iti nagbalin a resulta.
Malaksid iti daytoy, dua pay a nailian a rekord ti naburakna:
* 200-meter freestyle – 2:07.76, nga inabakna ti dati a 2:08.12 ni Rafael Barreto manipud iti Central Luzon idi 2013.
* 100-meter backstroke – 1:05.44, a nangsukat iti 1:06.38 ni Seth Isaak Martin manipud iti National Capital Region idi 2015.
Malaksid kadagiti indibidual daytoy a balligi, karaman pay ni Sia ti gold medal team iti 4x50m medley relay ken 100m freestyle isu nga addaan daytoyen ti lima a pakabuklan a balitok a medalya ita a tawen.
Daytoy ti maikadua a gundaway ni Sia iti Palarong Pambansa. Iti napalabas a tawen, nagun-odna ti tallo a gold, maysa a silver ken maysa a bronze a medalya. Ita a tawen, naartapanna ti dati a performance-na ken agtultuloy a mangipakpakita ti kinalaingna iti tay-ak ti ay-ayam.
Segun ken ni Sia, kumpiansa isuna a kabaelanna pay ti makagun-od ti nayon a balitok a medalya ken posible a makaburak pay ti baro a rekord.
Kabayatanna, inbatad ti amana a ni Mr. Niño Dominic Sia, nangrugi laeng ti swimming journey ti anakna idi panawen ti pandemia.
Inpadasda ni Titus iti basketball ken football ngem saanda a nagballigi kadagitoy.
Nupay kasta, idi immakarda iti swimming, ditoy a nakitada ti pudno nga interes ken talento ti ubing.
Kuna ti amana, mangnamnama a makagun-od pay ti anakna ti balligi ita a tawen gapu ta ti pannakipasetna iti Palaro ket sinaganaanda ti agarup maysa a tawen.
