LAOAG CITY – Nagun-od ti balitok a medalya ti maysa nga atleta manipud iti Northern Mindanao a ni Francis Cuabo iti kaunaan a freestyle event ti taekwondo a naisayangkat iti Mariano Marcos State University – Teatro Ilocandia iti siudad ti Batac.
Segun kenkuana, daytoyen ti maikatlo a tawen a nakipaset isuna ti Palarong Pambansa ngem ita laeng a nakagun-od ti balitok a medalya.
Inbatadna a dakkel a banag wenno tulong kenkuana ti ipapaay a suporta dagiti nagannak kenkuana tapno ad-adda a makapokus ti panagay-ayamna.
Kunana a dakkel pay a tulong ti naiget a suporta ken panangsanay kenkuana ti coach-na gapu ta ad-adda a naasa ti talentona.
Innayonna nga agpadada ti kabsatna a mahilig iti taekwondo ngem isuna laeng ti nakastrek iti Palarong Pambansa.
Mainaig iti daytoy, isagut ni Robbie Miguel Sun ti Gold Medalist iti Taekwondo Kyorugi manipud met laeng iti Northern Mindanao ti panagballigina iti pamiliana ken ti coach-na.
Kabayatanna, inpakaammo ni Mr. Jhun Rey Babatido, Coach dagiti nasao nga atleta nga arig awan ti sarday ti panangisayangkatda ti panagsanay tapno sigurado a makagun-odda ti balitok a medalya.
