LAOAG CITY – Napalaos ti ragsak ni Ariana Dawn Rabi, Region 1 Athletic Association Athlete a balligi a nagun-odna ti kaunaan balitok a medalya para iti Region 1 babaen iti Discus Throw event iti Palarong Pambansa 2024 a maiwaywayat idiay Cebu City.
Segun kenkuana, daytoy ti immuna a gundaway a nakipagpaset isuna para iti Palarong Pambansa no sadinno nangrugi daytoy a nagbalin nga atleta idi laeng napalabas a dua tawen.
Inbatad ni Mrs. Diomely Rabi, ina ni Ariana, a timmawag dagiti coaches ti anakna kenkuana tapnu ipakaammo a nagun-od ti anakna ti ummuna a balitok a medalya para iti Rehion 1 babaen iti maiwaywayat a Palarong Pambansa 2024.
Mainaig iti daytoy, nagbalin nga emosional ti kabsat ni Ariana a ni Alrielle Daine Rabi, gapu ta saanna namnamaen nga isuna ti agbalin nga ispirasion ti kabsatna a nakagun-od ti balitok a medalya.
Innayon ni Ariana a saanna nga ekspektaren a magun-od na ti ummuna a balitok a medalya para iti rehion 1 bayat a maiwaywayat ti nasao nga aktibidad.
Kabayatanna, inpanamnama ni Ariana nga itedna ti naan-anay a kabaelanna iti sumurano nga ay-ayam na iti Shot put event.
