LAOAG CITY – Mamati ti Philippine National Police – Criminal Investigation and Detection Group (PNP-CIDG) nga ammo ken nasaganaan ti negosiante a ni Atong Ang ti panangiyisyu ti arrest warrant kontra kenkuana.
Daytoy ti inrakurak ni Philippine National Police – Criminal Investigation and Detection Group National Capital Region Chief PCol. John Guiagui gapu iti kinalawa metten ti resources ken koneksion nga addaan ni Ang iti intero a pagilian.
Inadmitirna a marigatanda a mabirukan ti paglemlemmengan ti pugante a ni Ang.
Nupay kasta, inpasigurado ni Col. Guiagui a saan daytoy a lapped iti iwaywayatda a manhunt operation.
Patien ti ahensia a manarimaan nga agtigtignay ni Ang ken agtaltalinaed nga adda iti uneg ti pagilian.
Kunana nga awan ti rekord a rimmuar ditoy Pilipinas ni Ang isut gapuna a naiget ti panangbirbirukda iti negosiante agingga a naan-anay daytoyen a maarestar.
Agtultuloy ti panangberipikar dagiti otoridad kadagiti maaw-awatda a tips ken impormasion manipud iti hotline-da.
Maipalagip nga inbutaktak ti whistleblower a ni Julie Patidongan a nangitudo ken ni Ang a maipagarup nga akin-utek ti pannakapukaw dagiti mammallot a rumrummuar a nakaruaren ditoy pagilian ni Ang.
Inrakurak ni Philippine National Police spokesperson PBGEN Randulf T. Tuaño a maim-imbestigaran dagiti sumagmamano nga aktibo ken retirado a pulis pakairamanan dagiti senior officials a posible a tumultulong ken ni Ang.
Iti agdama, addan ti dua nga arrest warrant a naiyisyu kontra ken ni Ang manipud iti Korte ti Laguna ken Batangas.
Nagtalinaed ti naidiaya a 10 a milyon a pisos kas gunguna ti asinoman a makaipaay ti impormasion iti pannakaarestar ken ni Ang.
