LAOAG CITY – Kinumpirmaran ni Police Capt. King Ramos, hepe ti PNP Piddig ti kaadda ti nabukkel a plano tapno mamonitor dagiti estudyante iti Piddig National High School iti nasao nga ili.
Kuna na a nailungalong ti plano da babaen ti panagatendar da iti naangay a PTA meeting iti nasao a pagadalan.
Inlawlawag ni Ramos a masapul a mairaman kadagiti mangisursuro iti nasao a pagadalan ti “attendance monitoring system” kas inlungalong da iti naangay a taripnong.
Segun kenni Ramos, alaen dagiti mangisursuro iti first period ti attendance dagiti estudyante kasta met dagiti sumarsaruno a klase da.
Ditoy a makita dagiti estudyante no adda da a nagatendar iti klase wenno saan.
Innayon ni Ramos a makikoordinar laeng kadakuada babaen ti WCPD tapno mapakaamuan dagiti nagannak iti ub-ubraen dagiti annak da iti pagadalan kas iti panagliway ti klase.
Iti mainaig a damag, saan a baybay-an ti PNP Piddig ti panagmonitor kadagiti menor de edad nga agiturturong ti motorsiklo.
Daytoy ti kinumpirmaran ni Police Capt. King Ramos, hepe ti PNP Piddig kalpasan ti naangay a taripnong dagiti nagannak ken mangisursuro iti Piddig National High School.
Inbatad na nga indasar da pay ti incident monitoring system tapno malawlawagan dagiti mangisursuro ken nagannak dagiti pasamak.
Segun kenni Ramos, saan a mabalin a mapastrek dagiti estudyante a nagmaneho ti motorsiklo nga awanan ti lisensya.
Kuna na a masapul nga adda ti incident monitoring system ti guardiya mainaig dagiti mapaspasamak iti aglawlaw ken uneg ti pagadalan.
Innayon ni Ramos a babaen iti daytoy ket maipakaammo met kadakuada tapno ammo da ti aramiden para iti pannakaurnos dagiti saan a napintas a pasamak.
Maipalagip a naaksidente dagiti sumagmamano nga estudyante iti nasao a pagadalan iti ili ti Sarrat no sadinno a naregreg ti nagluganan da a tricycle iti deraas iti nasao nga ili.
