LAOAG CITY – Inlawlawag ti kampo ni Atty. Mans Carpio a saanda a gagem nga ipasardeng ti impeachment proceedings kontra ken ni Vice President Sara Duterte.
Daytoy ket kalpasan nga inbasura ti Quezon City Regional Trial Court Branch 81 iti petisyon ti kampo ni Carpio gapu iti maipagarop a kaawan ti hurisdiksyon na iti nasao nga isyu.
Iti maysa nga interview iti abogado ni Carpio a ni Atty. Neil Abayon kalpasan ti desisyon ti korte, inlawlawag na nga awan ti sabali a kalikagom da no ti manglapped ti maipagarop a saan nga otorisado a panangiparuk-at ti confidential documents da Carpio ken ti sawa na a ni VP Sara Duterte.
Gapu iti saan a panangituloy ti House Justice Committee a nanglukat ti green box a naglaon ti tax record ti agasawa, arigna napatgan metlaeng ti kiddaw ti kampo ni Carpio.
Iti baet ti panangibasura ti korte iti petisyon ni Carpio, inbatad ni Abayon a saan da a makitkita daytoy a maysa a dakkel a problema gapu iti immunan a nagbalin a desisyon ti House panel a saan a lukatan ti green box, iti laksid a naipublikar ti dadduma a records kas ti Anti-Money Laundering Council records ken Statement of Assets, Liabilities, and Net worth.
Nupay kasta, saan paylaeng nga iwalin ti kampo ni Atty. Carpio ti panagpila ti motion for reconsideration wenno ti mangiyapela iti nangatngato a korte.
Iti agdama, ob-obserbaren paylaeng ti kampo dagiti sumaruno nga addan ti kamara de representantes mainaig iti impeachment complaint kontra ken ni VP Duterte ken ti possible a pannakairaman iti nagan ni Atty. Carpio.
