LAOAG CITY – Patien ni Atty. Cherry Bareng-Asistin, agpaidasig iti kina-Konsehal ditoy siudad ti Laoag a ni Mayor Michael Marcos Keon ti nagkomento ti negatibo maipanggep kenkuana iti post ni Atty. Bryan Corpuz.
Segun kenkuana, pinaayaban isuna ti Mayor nga agturong iti opisina kalpasan iti maipagarup a komento ngem nagkedked daytoy a mapan sipud ta patienna nga awan ti nagbasolenna maipanggepiti isyu.
Maladingitan ni Asistin nga uray naikkaten ti maipagarup a negatibo a komento ti Mayor ket na-screenshot daytoyen ti ado a tao ken nadadaelen ti naganna ken imahena nangruna kety awan ti kinapagpaysuanan ti linaon ti komento.
Inlawlawagna a saan a pudno nga inlakona ti kararruana iti Team Marcos ken saanna met nga inibbatan ti kaso nga igiggemanna kas abogado ti nagreklamo no sadinno mannarimaan pay laeng ti prosesona daytoy.
Kabayatanna, kinunana nga agpaidasig isuna kas maysa nga independent candidate tapnu paneknekan a bukodna a desison daytoy ken awan ti nangutigot kenkuana no di ket ti laeng panggepna a makatulong ditoy siudad.
