LAOAG CITY – Pabor ni Atty. Carlos Isagani Zarate, Co-Chairman ti Makabayan Bloc a ma-impeach ni Vice President Sara Duterte.
Inbatadna a para kenkuana ket adda ti umdas a pagibasaran tapno mapadisi iti puesto ti Bise Presidente gapu iti saan nga umno a panagusar ti confidential funds, betrayal of public trust, saan a pannakailawlawag a naimbag maipanggep ken ni Mary Grace Piattos ken dadduma pay.
Inpettengna a nasken a dumatag ni Vice President Sara iti iwaywayat a panagdengngeg ti Committee on Justice iti House of Representatives gapu ta maikonsiderar daytoy a proper forum tapno ditoy nga ilawlawawagna dagiti alegasion kontra kenkuana.
Kunana a no bilang makumbiktaran ti Bise Presidente iti Senado kas impeachment court ket mabalin a madiskwalipikar daytoy nga agpaidasig iti aniaman a posision iti gobierno.
Inpaganetgetna a saan a mabalin nga iwalin ti panangiwayat ti impeachment proceedings nupay adda iti kangitingitan ti pagilian iti state of national energy emergency.
Kabayatanna, nagpanawagan ni Atty. Zarate kadagiti umili a singiren dagiti nangangato nga opisial ti gobierno nga agar-aramid ti anomalya ken maikanniwas iti paglintegan.
