LAOAG CITY – Inbatad ni Atty. Chel Diokno, maysa a Human Rights Advocate a napinpintas no sangwen ni Kingdom of Jesus Christ Pastor Apollo Quiboloy dagiti kaso a naipila kontra kenkuana tapno saanen a mairamraman pay dagiti followers na.
Daytoy ket kalpasan nga adda dagiti nairekord a nadangran apaman ti operasyon iti compound ti Kingdom of Jesus Christ.
Segun ken Atty. Diokno, no awan a talaga ti nagbasolan ni Quiboloy ket sagwen na dagiti maidardarum kenkuana.
Innayonna a no man pay adda dagiti maipap-palapayag a pakainaigan ti isyu ni Quiboloy ken ni dati a Presidente Rodrigo Duterte ket saan a mailimed a nabayagen a sangsangwen ni Quiboloy dagiti kaso a naipila kenkuana.
Inlawlawagna pay a saan kuma a mababalaw dagiti kameng ti Philippine National Police gapu ta sumursurot da laeng iti naiyetnag a pammilin, ngem inpaganetgetna a masapul met laeng a suroten da dagiti rumbeng ken saan a rumbeng nga ubraen.
Iti met biang dagiti kameng ti Kingdom of Jesus Christ, masapul met laeng nga adda panagraemda iti linteg.
Kunana a no adda search warrant ket mabalin latta a maiwayat uray pay iti uneg ti simbaan ngem maibilang nga unlawful no adda dagiti madangran apaman a maisaysayangkat ti search warrant operation.
Kabayatanna, inpaganetget ni Atty. Diokno nga importante a nakasuot latta dagiti kameng ti pulisya ti body camera tapno maamwan no umno met laeng ti pannaka-ipatungpal ti search warrant.
