LAOAG CITY – Saan nga ammo ni Atty. Neri Colmenares, Human rights lawyer ken dati a congresman no anya ti pudno ken saan iti maikalima a State of the Nation Address (SONA) ni Presidente Rodrigo Duterte.
Iti pannakinnuman ti Bombo Radyo Laoag kenni Colmenares, saan a nalawag ken saan na nga ammo no patyen na dagiti inrakurak ti presidente kas iti panagupa kadagiti apartment ken balay ken ti limited face to face classes.
Segun kenni Colmenares, inrakurak ni Presidente Duterte idi Marso a no saan a makabayad ti upa iti balay dagiti tattao ket gobierno ti agbayad ngem maipagarop nga awan met ti napasamak a kastoy.
Dinakamat na pay ti panangibabawi na iti limitado a face to face classes kadagiti maibilang a low risk area iti covid-19 iti laksid nga immanugot iti DepEd itay laeng kallabes.
Inpetteng na nga awan ti intensyon ni Presidente Duterte nga aramiden dagiti amin nga ibagbaga na ken saan na a kayat nga admitiren a palpak ti administrasyon mainaig iti krisis gubuay ti virus kasta met ti kurapsyon.
Kuna pay ni Colmenares a maipagarop a saan nga ammo ti presidente ti aramiden na tapno makabangon ti pagilyan gapo ta saan na pay a nadakamat iti SONA na ti mass testing ken ti pakaseknan dagiti testing center iti intero a pagilyan.
Kwinestyunaran pay ni Colmenares ti rakurak ni Duterte a paimbestigar na ti arungaing dagiti jeepney drivers, ken no apay nga ita laeng nga aramiden na daytoy iti laksid a nabayagen a maipadpadamag ti kasasaad dagiti maseknan.
Mainaig iti daytoy, kuna ni Colmenares a positibo kuma ti panagkita na iti panangkritikar ti presidente kadagiti telecommunications ditoy pagilyan gapo ta nangina ti singir da uray no palpak ti serbisyo da.
Nupay kasta, inbatad ni Colmenares nga arig na saan a mamati iti daytoy gapo ta mabalin a wagas laeng daytoy ti presidente tapno makastrek ditoy pagilyan ti kompanya ti China nga isu ti paboran na.
Kabayatanna, saan met a pabor ni Colmenares iti pannakaisubli ti death penalty gapo ta ibilang nan nga adda ti dusa a patay ditoy pagilyan seknan iti war on drugs ti administrasyon.
Inlawlawag na nga uray adda ti death penalty no agrigat dagiti Pilipino ket saan da a kabuteng daytoy.
