LAOAG CITY – Inpasingked ni Atty. Donato Balderas ti Schools Division Superintendent ti Department of Education – Ilocos Norte a natalged dagiti pagadalan ditoy probinsia.
Daytoy ket kalpasan ti shooting incident a napasamak iti maysa a pagadalan idiay Tacloban City a nakatayan ti 3 nga indibidual ti natay ken 7 dagiti nasugatan, no sadinno ti maipagarop a rason ket gapu iti panagbully.
Kunana nga iti agdama ket awan ti kaso ti bullying wenno aniaman a violente a pasamak kadagiti pagadalan ditoy probinsia.
Segun kenkuana, maysa kadagiti patien na a rason no apay nga awan dagiti mairekrekord a kaso ti bullying kadagiti pagadalan ditoy probinsya ket dakkel a tulong ti maipatpatungpal nga orientation ti code of discipline nga at-atendaran dagiti annak ken nagannak.
Inadmitir na nga adda met dagiti maidandanon a saan nga umno nga aramid kadagiti pagadalan ket maibilang a minor cases laeng dagitoy kas koma iti panagsigarilyo.
Innayonna nga agtultuloy ti pannakikoordinarda kadagiti local government units (LGU), nailian a kapulisan, barangay officials ken dagiti nagannak tapno maipasigurado ti kinatalged kadagiti pagadalan ken maipasigurado ti seguridad dagiti agad-adal ken mangisursuro.
Mainaig iti daytoy, nagpanawagan ni Balderas kadagiti nagannak a sakbay a sumrek iti pagadalan dagiti annak ket masapol a kitaen da nga umuna ti bag dagitoy tapno masigurado nga awan ti bitbitda a mabalin a makadangran iti pada da nga estudyante.
Kabayatanna, kunana nga awan ti serbina dagiti maipatungpal a gakat no awan ti naiget a pannakaipatungpalna tapno adda panangbuteng dagiti agad-adal a manggandat iti saan a nasayaat nga aramid.
