LAOAG CITY – Nakapungtot ni Atty. Ferdinand Ignacio mainaig iti nagbalin a tignay ti PNP kalpasan a nagpatulong kenkuana ti maysa a negosyante a ni Jojit Pacariem Jardinan no sadinno a naitudo kas maysa a drug surrenderee babaen kadagiti kameng ti PNP iti ili ti Paoay.
Inlawlawag na a namunganay daytoy kalpasan a natiliw ti maysa nga empleyado ti kliyente na iti kallabes mainaig iti iligal a druga ken nakadetine iti BJMP iti siudad ti Batac iti agdama.
Kuna na a naisawang ti empleyado a ti financer na ket ti maseknan a kliyente na.
Mainaig iti daytoy, inbatad ni Ignacio a bayat a nakaquarantine pay ti kliyente na iti kallabes ket adda ti operasyon ti PDEU mainaig iti kaadda ti miembro ti NPA iti Brgy. Cayubog.
Target da dagiti paltog ngem ti naduktalan da ket ti iligal a druga dita a napilaan ti maseknan iti kaso ngem dinismiss ti piskalya.
Inbunannag ni Ignacio a ti gagem ti nasao nga operasyon ket tapno maitudo manen ti negosyante.
Mainaig iti daytoy, kuna na nga adda ti asset ti pulis a residente iti Brgy. Billoca iti siudad ti Batac no sadinno a maipagarup nga iset-up na ti kliyente a mapan na gatangen ti lugan na.
Inbatad na nga adda met dagiti pulis a mangisakit iti kliyente na no sadinno a binalakadan da a saan a mapmapan gapu ta matiliw daytoy.
Gapu iti daytoy a pasamak iti maseknan ket nagpablotter iti PNP Paoay ngem idi nakita ni Police Major Eddie Suyat, sinaludsod na no isuna ni Jojit Pacariem Jardinan.
Segun kenni Atty. Ignacio, inbatad ni Suyat kenni Jardinan no kayat na a dalusan ti nagan na mainaig iti iligal a druga ngem naglikudan na daytoy.
Inbatad ni Ignacio, a basar iti palawag ti kliyente na a nagkita da kenni Officer Marumi seknan ti nasao a banag.
Kabayatanna, kuna na a naikkanen ti affidavit of undertaking ni Jardinan a pirmaan na ngem nagdesisyon nga ipakita na daytoy kenkuana.
Inbunannag ni Atty. Ignacio a ti linaon ti affidavit of undertaking ket mainaig iti panagsuko ti maseknan a daytoy ket drug user ken kayat nan agbalbaliw.
Gapu iti daytoy, nakasuron ni Atty. Ignacio gapu ti saan nga umiso nga addang a naaramid.
Kuna na nga imbes a maiyuna iti panagkalap ti impormasyon ken ebidensya ket arig nalaklakan ti trabaho da.
Kalikagum na nga idanun iti nangatngato nga opisina daytoy a banag.
Maisumitir met ita nga aldaw ti narebisar nga affidavit of undertaking iti PNP Paoay a maibagbaga a maysa nga employer ti maseknan a mangipapaay ti trabaho ken sidadaan a makikooperar no bilang adda kadagiti empleyado na ti mairaman iti operasyon ti iligal a druga.
Gagem laeng ni Atty. Ignacio a maikorehir ti saan nga umiso nga addang iti PNP kas iti napasamak iti kliyente na.
