LAOAG CITY – Inlawlawag ni Atty. Gerald Gallardo ti officer-in-charge iti Department of the Interior and Local Government ditoy probinsya a ti Good Financial Housekeeping 2023 ket maysa laeng kadagiti sangapulo a sangay ti Seal of Good Local Governance.
Daytoy ket kalpasan a nabigbig ken naikkan ti sertipikasyon a 2023 Good Financial Housekeeping Passers ti ciudad ti Laoag, ciudad ti Batac dagiti ili ti Adams, Bacarra, Badoc, Bangui, Banna, Burgos, Carasi, Currimao, Dingras, Dumalneg, Marcos, Nueva Era, Paoay, Pasuquin, Piddig, Pinili, San Nicolas, Sarrat, Solsona, ken iti ili ti Vintar.
Segun ken ni Gallardo, daytoy a pammigbig ket para kadagiti local government unit no la ketdi napintas ti panag-comply da kadagiti regulasyon ti Commission on Audit wenno COA.
Impakammo na a ti Good Financial Housekeeping ket addaan ti dua a kriteria.
Umuna iti daytoy ket no ti audit opinion nga inrender ti Commission on Audit ket unmodified ket makwalipikar da, ngem no ti opinion ket adverse kayat na a saw-en saan da a na-meet tay rules and regulations ti Commission on Audit.
Ti maikadwa ket ti panag-comply da iti full disclosure policy nga inmandate ti local government units a dagiti amin a financial documents ket nakailanad iti report ken assessment ti maysa nga a manisipalidad wenno ciudad.
Malaksid iti dayta ket masapol pay a maipasa ti maysa a local government unit ti annual budget da.
Kabayatanna, imbatad ni Atty. Gallardo a ti sertipikasyon iti Good Financial Housekeeping ket maysa a requirement iti aniaman a financial institution, no kas pagarigan a kayat ti maysa a Local government unit ti ag-loan.
