LAOAG CITY – Mamati ni dati a Presidential Spokesperson Atty. Harry Roque nga agingga a saan a madusa da Presidente Ferdinand Marcos Jr. ken dati nga House Speaker Martin Romualdez ket saan a naan-anay a mapukaw ti pungtot dagiti umili.
Daytoy ket kagiddan iti immuna a testimonia ni dati nga Ako Bicol Partylist Representative Zaldy Co nga ammo ni Presidente Marcos ti napasamak iti P100 billion nga insingit iti 2025 national budget.
Inbatad ni Roque a maysa a ‘whistleblower’ ni Zaldy Co ken saan daytoy nga agpangadua kadagiti nairuar a testimonia.
Sinuportaran ni Roque ti takder ni Co a ni Presidente Marcos ken ti kasinsinna a ni Romualdez ti mismo a mastermind iti nalawa a korapsion kadagiti flood control project ken dadduma pay a public structures iti pagilian.
Kunana a no kalikagum ti gobierno a mapukaw ti pungtot dagiti umili ket rumbeng laeng a madusa dagiti dua.
Nasaludsod ni Roque no apay a kasapulan pay a kiddawen ni Presidente Marcos nga idalan iti binilyon a pisos nga insertion iti babaen ti Bicameral Conference Committee kas ti iyak-akusar ni Zaldy Co no mabalin met nga aramiden daytoy ti Presidente iti mismo a National Expenditure Program (NEP).
Sungbat ni Roque, ti Bicam report ket saan a maibutbutaktak iti publiko idinto a ti linaon ti National Expenditure Program ket naipablaak ken mabalin daytoy a babalawen nga insigida kadagiti dadakkel nga insertion.
Kabayatanna, immunan nga inpetteng ni Presidente Marcos nga isuna ti nangirugi iti nalawa ken naun-uneg nga imbestigasion mainaig kadagiti maanomalya a public infrastructure project rason nga isuna met laeng ti manglippas ti kampania iti daytoy.
