LAOAG CITY – Inpetteng ni Atty. Jason Perera nga awan ti napasamak a vote buying iti ili ti Sarrat ken Piddig.
Segun kenni Perera, ti makunkuna a panaggatang ti butos ket ti kaadda ti mangiyawat ken adda ti tao a mangawat iti kwarta a pabor iti maysa a kandidato.
Inlawlawag na a nalawag nga harassment ti napasamak nangruna ket maipagarop a parbangon ti panagkatok dagiti pulis a nangitunda ti panagbuteng dagiti kakadua da.
Inbatad na nga iti napasamak iti ili ti Sarrat, daytoyen ti kagrabean a napadasan na gapo ta arig na ket saan nga ammo dagiti pulis ti ar-aramiden da.
Kunana a maawatan da ti kalikagom dagiti pulis nga iggaman ti kwarta ngem mailabsing daytoy iti karbengan ti maysa a tao nangruna ket naipan pay dagitoy iti istasyon ti pulisya iti laksid a dagitoy ket awan met iti babaen ti “under arrest”.
Inpalgak na a naibaga met dagiti pulis nga adda ti napasamak a krimen ngem agimbestigar da.
Kunana nga immabot iti nasurok maysa nga oras a nakidebate kadagiti pulis seknan iti daytoy a banag gapo maipagarop a saan a kayat a papanawen dagiti otoridad dagiti coordinators da iti laksid ti panagbuteng da ken dagiti pamilya da ken ti bisin da.
Dinakamat na a rumrumuar a ti saan a pannakaipalubos nga agawid dagiti coordinators ket maipagarop a mandar ti superior da.
Mainaig iti daytoy, mangnamnama ni Perera nga agserdeng ti mapaspasamak nga unfair election process ken maipagarop nga harassment.
