LAOAG CITY – Inlawlawag ni Atty. Juanito Antonio, maysa a private lawyer, ti panagbalin a hostile witness ni Atty. Michael Poa a dati a chief of staff, finance officer, ken spokesperson ti Department of Education (DepEd).
Kunana a ti hostile witness ket maysa a testigo a saan nga interesado wenno saan a makikooperar iti indibidual a nangawag kenkuana.
Inbatadna a kasapulan pay laeng a ma-classify ti maysa a witness no hostile daytoy, ket no mapalubosan ti korte a matratar daytoy a hostile, mabalin wenno maipalubos ti nawaya ang panagsaludsod kenkuana ti prosecution team.
Kinunana pay a kasapulan a nasirib ti agsaludsod kadaytoy gapu ta mabalin a maibutaktak dagiti napateg nga impormasion gapu ta dakkel ti posibilidad nga amin a masaludsod kenkuana ket pagkedkedan na a sungbatan.
Iti biang ni Atty. Poa, kuna ni Atty. Antonio, a kasapulan a nasirib ti prosecution team gapu ta daytoy a testigo ket nasinged iti Bise Presidente ken ado ti impormasion nga isuna laeng ti makaammo.
Mainaig iti daytoy, kuna ni Atty. Antonio a napateg a witness ni Atty. Poa gapu ta daytoy laeng ti makaammo no kasano a na-liquidate ti pondo, no kasano a nausar, no napanan ti pondo, ken ti nagbanagan daytoy.
Naideklarar ni Atty. Michael Poa kas hostile witness iti agtultuloy nga impeachment trial ni Vice President Sara Duterte nga inruar a desision ni Senator Francis ‘Chiz’ Escudero kas presiding officer ti korte a nangipaay iti prosekusion ti pammalubos nga agsaludsod ti leading questions.
