LAOAG CITY – Kwinestionaran ni Atty. Juanito Antonio, maysa a private lawyer, no ana ti pakainaigan dagiti alias nga ar-aramaten dagiti bannuar ti pagilian ken dagiti alias a nausar maipaggep ti impeachment trial ni Vice President Sara Duterte.
Inbatadna a dagiti ti panagusar ti alias ti agdama nga isyu ket kas panangilimedda iti katatao no siasinno ti napanan dagiti kuarta.
Dinakamatna a dagiti alias nga inusar dagiti bannuar tayo ket inusar da kas “nom de guerre’ wenno pseudonym bayat ti panangidangadang kadagiti nangikuspil a ganganaet tapno ilimedda ti kinataoda.
Kunana a “heroic act” daytoy a wagas dagiti bannuar tayo ngem iti alias a maipanggep iti impeachment ket awan opisial a panangideklerar no sianno dagitoy ken no ana ti kinatao dagiti alias.
Inpaganetgetna nga awan ti kinatao wenno awan ti na-identify a katatao dagitoy nga alias kas da Mary Grace Piattos, Andy Lim, Xuniso P. Belat, Pagong, Pusa, ken dadduma pay.
Inpettengna a saan a mapapati nga dagitoy a nagnagan ket pudno a tattao a naidulin ti kinataoda.
