LAOAG CITY – Inlawlawag ni Atty. Mar Quitoras nga awan ti panagtulag da kenni dati a Konsehal Marvin Pascua a pagkadwaan da ti Mayor Joseph de Lara ken ni Atty. Delos Reyes isut gapuna a nagnotaryo iti complaint affidavit ti dati nga opisyal.
Inpetteng na kas maysa nga abogado ket trabaho na ti agnotaryo kadagiti kliyente na.
Inbatad pay ni Atty. Quitoras nga awan ti personal nga ammo na iti alegasyon ni Pascua gapu ta ti laeng trabaho na kas maysa nga abogado ket ti mangdeterminar no ti tao a napan nagpanotaryo ket isuna metlaeng babaen ti panangkita da ti Identification Card na.
Inadmitir ni Quitoras nga am-ammo na unay ni Pascua gapu ta pada na a taga Solsona ken dati a konsehal iti nadakamat nga ili.
Innayon na a no bilang mapan met agpanotaryo ni Mayor de Lara ket aramiden na gapu ta isu ti sinapataan na a trabaho.
Mainaig iti daytoy, inpasingked ni Quitoras a saan nga isuna ti abogado ti dati a konsehal iti panagpila na ti reklamo iti ombudsman.
