LAOAG CITY – Binabalaw ni Atty. Harry Roque ti International Criminal Court (ICC) gapu iti maipagarup a saanen a masursurot ti pudno a pagannurotan ti hurisdiksion daytoy kas maysa a korte.
Inpetteng ti International Criminal Court-accredited lawyer a mangpilpilit ti international tribunal a mangtingiting ti maysa a pagilian iti baet ti kinaawan ti hurisdiksion.
Binabalaw daytoy ti maipagarup a pannakibiang ti nasao a korte kadagiti pagilian a saan a miembro ti Rome Statute no sadinno nga awan ti karebbengan ti international court a mangiwayat ti panangtingiting.
Dinakamat ti abugado ti kaso ni dati a Presidente Rodrigo Duterte (FPRRD) nga iti baet a nabayagen a panagikkat ti Pilipinas iti hurisdiksion ti International Criminal Court ket nangiruar latta daytoy ti warrant of arrest.
Inpetteng ti dati a Duterte appointee nga iti agdama a situasion ti International Criminal Court no sadinno a sumangsango kadagiti nagduduma a sanctions dagiti sumagmamano a judges ken prosecutors daytoy ket nasken a babalawen iti mismo a korte.
