LAOAG CITY – Naikeddeng nga idaulwan ni Atty. Sheila Sison, a mabigbigbig iti 16 nga abogado a mangilaban ken ni Vice President Sara Duterte iti umadanin nga impeachment trial iti Senado intono Hulyo 6.
Immunan a naisayangkat ti pre-trial conference iti nagbaetan ti kampo ni Vice Presidente Duterte ken ti House prosecution panel.
Idaulwan ni Atty. Michael Poa para iti depensa ken Batangas 2nd District Rep. Gerville Luistro para iti prosekusyon.
Maysa kadagiti napagsasaritaan kalpasan ti taripnong ket ti maipagarop a panangsapaw ti kampo ni Duterte iti House prosecution panel, banag a naiget a naglikudan ni Bicol Saro Party-list Rep. Terry Ridon, miembro ti prosecution panel.
Kabayatanna, immunan nga inbatad ni Clerk of Court ken Senate Secretary Renato Bantug Jr. a normal laeng ti naiget a sinnukat ti argument iti kastoy ti klase na a panagdengngeg.
Inpaganetget ni Bantug a nupay adda dagiti napasamak a panagsisinnungbat iti nagbaetan dagiti abogado, maibilang paylaeng daytoy a paset ti gagangay a proseso ti legal a diskusyon.
Personal met a naglikudan ni Luistro dagiti report a maipagarop a nasapawan ti House prosecution panel iti pre-trial conference.
Iti baet dagiti isyu, ado dagiti napukaw ti imatangna ken ni Atty. Sheila Sison kas kangrunaan nga abogado ti depensa ni Vice President Sara Duterte.
Segun iti Fortun Narvasa & Salazar Law Firm, ni Sison ken maysa nga abogado a nakatutuk iti panangipaay ti nangato a lebel ti serbisyo a legal tapno masigurado ti hustisya para kadagiti kliyente na kabayatan ti panangprotehir na kadagiti karbengan iti panagbiag, kinawaya ken sanikua.
Dinakamat pay ti law firm a masansan nga iggaman ni Sison dagiti komplikado ken nadagsen a kaso a saan a kayat a serken ti kaadoan nga abogado.
Nagturpos ni Atty. Sison ti Bachelor of Arts in Communication Arts, major in Writing, iti University of the Philippines Los Baños.
Nalpas na ti Bachelor of Laws iti San Sebastian College of Law–Recoletos, no sadinno a daytoy ket nagbalin nga Academic Scholar of the Recoletos Order.
Kabayatan ti panagadal na ti abogasya, nagbalin a consistent Dean’s Lister ni Sison ken nagturpos kas Class Valedictorian.
Napadayawan pay daytoy ti Academic Excellence Medal of Honor ti Recoletos Educational Apostolate of the Philippines.
