LAOAG CITY – Nangrugin ti gobierno ti Australia iti nalawa a panagdalus kalpasan ti napasamak a panaglayus a nakatayan ti lima nga indibidual ken nakadadaelan ti sumurok sangapulo a ribu a sanikua.
Inbatad ni Australian Prime Minister Anthony Albanese, inpasigurado ti gobiernoda nga amin a naapektaran a residente ket makaawat ti maiyannatop a tulong.
Insigida a naisayangkat ti damage assessment idiay New South Wales nga ad-adda a naapektaran ti layus.
Iti agdama, apagapaman a simmayaaten ti kasasaad dagiti sumagmamano a lugar a naapektaran ti panaglayus.
Naammoan a ginasut a residente ti nagtalinaed kadagiti evacuation center.
Naudi a naipadamag a natay gapu iti panaglayus ket ti agtawen ti 80 a lalaki no sadinno a nabirukan ti bangkayna kadagiti nalayus a kagamitan.
Kabayatanna, inpasingked ti gobierno ti Australia nga agtultuloy a mangipadanon daytoy ti tulong kadagiti amin a naapektaran ti nakaro a layus.
