LAOAG CITY – Nagusar ti kapulisan idiay Australia ti pepper spray kadagiti agiwaywayat ti tignay protesta.
Kinontra dagiti agiwaywayat ti tignay protesta ti panagbisita iti pagilian ni Israeli President Isaac Herzog.
Inarestar dagiti otoridad dagiti sumagmamano nga indibidual kalpasan a nagbinnarada iti kapulisan.
Adda idiay Australia ni Herzog tapno kumustaen dagiti kabagian dagiti pimmusay iti napasamak a pammaltog iti Bondi Beach iti napalabas a tawen.
Iti uppat nga aldaw a panagbisita ni Herzog ket binisitana dagiti tanem dagiti natay a biktima ti Bondi beach shooting.
Inimbitaran isuna ni Australian Prime Minister Anthony Albanese a gagem a maaddaan ti panagkaykaysa ken agbalin a kalmado dagiti biktima ti Bondi beach shooting nga agpapada dagitoy nga Hudyo.
Inpasigurado dagiti protesters nga itultuloyda ti panangiwayat ti tignay protesta a lumawa pay kadagiti nagduduma a paset ti Australia.
